مسرحية :
المرضي لا يدخلون الجنة
( مسرحية ذات الفصل الواحد )
المشهد الأول
المنظر : سرير فخم مذهب عليه ريش نعام ينام عليه ممثل يتقلب وكأنه يري كابوساً مرعباً ويتأوه بشكل ملفت للنظر وكأنه يعاني من ألم شديد..ثم يصرخ مفزوعاً ويفيق من نومه.
(إضاءه باهته علي الممثل فقط)
الممثل : ايه ده؟!..أنا مال جتتي تقيله كده ليه النهاردة؟!..ااااه..دماغي هاتنفجر..يا ساتر..(يكح كحة شديدة)..لأ لأ..كده غلط..هو دور البرد الرخم ده مش راضي يسيب الواحد ولا ايه؟!..(يعطس)..
(يضاء حول صورة فوتوغرافية كبيرة للممثل وهو يرتدي ملابس رثة علي ستاند بجانب السرير)
الصورة : (صوت من الكواليس) يرحمكم الله..
الممثل : مين؟!..انت؟!..انت ايه اللي جابك هنا؟!..
الصورة : وحشتني..قلت آجي أسلم عليك..مش أنا وإنت واحد؟!
الممثل : لأ..أنا واحد تاني غيرك..
الصورة : كداب
الممثل : (يتحسس ملامح وجهه كلها)..أيوه..أنا واحد تاني..لأ..ايه ده؟!..دا أنا..
الصورة : مش قلتلك..
الممثل : وانت ايه اللي جابك هنا قلت؟!
الصورة : بسلم عليك بس..ايه.. هانت عليك العشرة؟!
الممثل : انا مش فاكرك!
الصورة : طب ومش فاكر برضه دي؟
(إضاءه علي صورة فوتغرافيه أخري لجندي يحمل مدفعاً رشاشاً وعلم في يديه)
الممثل : لأ..بلاش دي..
الصورة : تراب البلد ناداهم..وانت..كنت فين؟!
الممثل : انا مش ممكن أبيع نفسي عشان شوية تراب..كل دول أغبيا..
الصورة : ليه هربت ساعتها؟!
الممثل : مهربتش..أنا عملت الطبيعي..عشان ايه أضيع نفسي..ما تتحرق كل حاجة..وبعدين أنا شكلي عيان وعندي حرارة..كفاية كده
الصورة : أنا هامشي..بس تفتكر انك هاتخف من دور البرد اللي عندك ده
الممثل : وايه المانع..الفلوس موجودة والدوا ف الاجزخانات!
الصورة : يعني انت تقدر تشتري كل حاجة بفلوسك؟!
الممثل : أكيد
الصورة : وتقدر تدور فلوسك وتكسب؟
الممثل : أكيد
الصورة : وبتحب تبيع أكتر ولا تشتري؟!
الممثل : أنا طول عمري شاري وابن بلد..فاهمك وعارف تقصد ايه!
الصورة : وليه بقي بعتها؟!
الممثل : هي ايه دي اللي بعتها؟!
الصورة : ذكريات كليتك القديمة..أول حب يا بن البلد
(تضاء حول صورة ثالثة لفتاه جميله)
الممثل : ايه ده؟!..مين دي؟!..أنا معرفهاش..معرفكمش كلكم..ابعدوا عني..
(يهم بتقطيع الصور واحدة تلو الأخري مبتدأ ً من الثالثة)
الصورة : قبل أما تقطعني..فيه سؤال لازم أسألهولك لأن صحتك تهمني!..مدام بتقول انك تقدر تجيب الدوا بفلوسك..ليه من سنين مخفتش م دور البرد دا؟!
الممثل : (في انفعال واضح)..مين اللي قال إني مخفتش..أنا صاحي النهاردة كويس قوي..قوي
الصورة : دا انت لسه قايل انك تعبان وعندك حرارة!!
الممثل : ..(يمسك رأسه)..اه..ب...س..بس هو صدا..صداع بيجيني كده كل شوية..(ترتفع آهاته)..آآآه..دماغي..(يسقط أرضاً)
(إظـــــــــــــلام)
المشهد الثاني
المنظر : الممثل ينام علي السرير الفخم وبجواره الطبيب يجري عليه بعض الفحوصات...في هذه الأثناء تدخل ممثله وتلتقط من علي الأرض جزئي الصورة الفوتوغرافية الممزقة الخاصة بها وتتخذ مكاناً جانبياً ويدخل ممثل2 ويفعل مثل الممثله ويتخذ مكاناً جانبياً فوق سرير من الخيش والمعدن الصدئ...يحيط المشهد موسيقي تبعث علي القلق.
الممثل1 : تعبان يا دكتور..
الطبيب : بتشتكي من ايه ؟
الممثل1 : دماغي هاتفرقع وجسمي مدغدغ..حاسس ان الناس كلها بتضرب فيا بالشلاليت..آآه يانا
الطبيب : طب اهدي بس أشوف حرارتك..(يلتقط الترمومتر ولكن ينزلق من يديه ويقع علي الأرض وينكسر)..أه..يوووه..هو دا وقته
الممثل1 : ها يا دكتور..الحراره عال..عالية؟
الطبيب : الترموتر اتكسر..ومش معايا غيره..
الممثل1 : والعمل؟!..آآآه..أنا بمو..بموت
الطبيب : المشكله ان الوقت متأخر جداً وانت ساكن ف حته مقطوعة لوحدك..تفتكر يبقي فيه اجزاخانات فاتحه..الوقت مش هايسعف.. أقولك .. هحاول أصلح اللي اتكسر..ثواني بس ألمه من ع الأرض
الممثل1 : معكش طيب مسكن ير..يريح الواح..آآه..يريح الواحد؟!
الطبيب : مبحبش أوصف دوا لمرض مشخصتوش لسه..صبرك ثواني أحاول أصلح اللي اتكسر
( يثني ظهره ويحدق ف الأرض ويمشي متتبعاً أجزاء الترموتر المكسور وبقعة الضوء تتبعه حتي يصل إلي الممثله ثم يتركز الضوء أكثر )
الطبيب : (في ذهول شديد)..ها؟!!..إنتي مين؟!
الممثلة : أنا واحده اقدر أخفف العيان اللي انت بتعالجه دلوقتي يا دكتور بلمسه واحده من ايديا علي جبينه
الطبيب : ازاي بقي؟!..هاتسحريله..أهو أنا دكتور أهو ولايص معاه
الممثله : لأ.. بالحب
الطبيب : بالحب؟!..إنتي بتحبيه؟
الممثله : لأ..أنا بس مش قادره انساه ولا انسي اللي عمله معايا
الطبيب : (في فضول)..وعمل معاكي ايه..ها؟!
الممثله : المريض هايموت يا دكتور..اعرض عليه الكلام اللي قلتهولك
الطبيب : طب وايه اللي مخليكي تعرضي عليا انك تخففيه؟
الممثله : صعبان عليا بس
( تنسحب الإضاءه ويذهب الطبيب إلي المريض "الممثل1" )
الممثل1 : ك..ك..كل دا يا دكتور؟!..آآه..صل..صلحته؟!
الطبيب : لأ
الممثل1 : حرااااام عليك..
الطبيب : اهدي بس.. أنا لقيتلك دوا جاهز حالاً (يميل علي أذنه يهمس له)
الممثل1 : (يصرخ بأعلي صوته)..لأ..لاااااااء..مش ممكن..مش هايحصل..لو وافقت هابقي عبد لايديها دايماً طول حياتي..وأنا عملت كل حاجة لوحدي..أنا وبس..(يكح كحة شديدة)
( في هذه الأثناء تضاء بقعة ضوء علي الممثله..تحتضن جزئي صورتها الممزقة وتهم بالرحيل خارج المسرح..تحيط الحركة موسيقي تبعث علي الحزن )
الطبيب : طب اهدي..خلاص..يعني مش هاينفع؟!
الممثل1 : أبداً..(يئن)
الطبيب : : طيب..طيب..(يذهب الطبيب مرةً أخري يبحث عن أجزاء الترمومتر المنكسر وعندما يصل إلي المكان السابق للمثله يجده فارغاً)..ايه ده؟!..هي راحت فين؟!!
الممثل2 : (من علي سرير الخيش)..مشيت
الطبيب : (يلتفت اليه مذهولاً)..وانت مين؟!
الممثل2 : : واحد زيها..(يقوم من علي السرير ويتحرك إلي الطبيب في خطوات تنم عن ثقة مفرطة)..دي كانت آخر فرصة ليه .. خسارة ..المهم أنت كنت بتدور علي حاجة؟!
الطبيب : ها؟!..آه..بدور علي اللي انكسر م الترمومتر..عايز أصلحه واقيسله الحرارة
الممثل2 : عيب عليك أنك تدور ع اللي انكسر..اللي انكسر عمره ما يتصلح يا دكتور..
الطبيب : المشكله إن أنا عارف كده كويس..بس أهي محاولة
الممثل2 : مفتكرش تنجح
الطبيب : طب عندك حل؟!..ماتساعدني ..إنت تعرفه؟!
الممثل2 : طبعاً
الطبيب : ايه..أصحاب؟
الممثل2 : كنا
الطبيب : طب ماتيجي معايا نحاول نساعده
الممثل2 : مقدرش
الطبيب : وليه لأ؟
الممثل2 : لأن أنا مش موجود هنا دلوقتي..مكاني هناك (ثم يشير إلي سرير الخيش)..أقعد فيه بصحتي أحسن ماقعد علي سرير دهب واتعدي منه..لكن قبل ما أمشي..أحب أقولك إن المريض اللي معاك دا يا دكتور مش هايخف إلا بحاجة واحدة بس
الطبيب : ايه هي؟!
الممثل2 : عصير تراب الشوارع والحارات
الطبيب : ايه..ع ص ي ر .. ت ر ا ب !!!
الممثل2 : تراب البلد..دا الدوا اللي هايشفيه
( يعود الممثل2 إلي مكانه... يرمي الطبيب أجزاء الترمومتر التي جمعها ويعود مسرعاً إلي الممثل1 في السرير المذهب...يجمع الطبيب حاجياته ويستعد للمغادرة )
الممثل1 : ها يا دكتور..(يعطس)..أبوس ايدك الحقني..صلحته؟!
الطبيب : لأ.. معرفتش..وللأسف..دواك مش عندي..سلامو عليكم
(يغادر الطبيب المسرح)
( يعلن المخرج نهاية المسرحية...تدخل مجموعة العمل من فنيين وعمال وهم يصفقون..ويبدءون في فك الديكورات وخصوصاً السرير المذهب ويتركون المسرح فارغاً إلا من سرير الخيش والصورة الفوتغرافية للممثل1 بالملابس الرثة وتسلط عليهما بقعتي ضوء...يقوم أحد الفنيين بقلب الصورة لتظهر للجمهور جملة مكتوبة علي ظهر الصورة "المرضي لا يدخلون الجنة" )
(ســـتــــــــــار)
موضوع: المرضي لا يدخلون الجنة 
الجمعة نوفمبر 16, 2007 12:18 pm